வானம் நமக்கொரு போதிமரம் - எங்கே முடிகிறது வானம்?

எல்லா நிறங்களையும் கொண்டுள்ள சூரிய ஒளி, வளிமண்டலத்தில் நுழையும் போது, வாயு மூலக் கூறுகளில் மோதிச் சிதறல் அடைகிறது. குறுகிய அலைநீளம் கொண்ட நீல ஒளி அனைத்துத் திசைகளிலும் அதிகமாகச் சிதறடிக்கப் படுவதால், வானம் நீலமாகக் காணப்படுகிறது.

இந்த வானம் எவ்வளவு உயரம் கொண்டது? எங்கே முடியும்? முடியும் இடத்திலிருந்து விண்வெளி தொடங்குமா? இந்தக் கேள்விகள், 1957 அக்டோபர் 4 அன்று சோவியத் ஒன்றியத்தால் முதல் செயற்கைக்கோளான ஸ்புட்னிக் I பூமியின் சுற்றுப்பாதையில் நிலைநின்ற உடன் முக்கியத்துவம் பெற்றன. உலகின் பல நாடுகளின் மேலே ஸ்புட்னிக் பறந்து சென்றது. எங்கே ஒரு நாட்டின் வான் எல்லை முடிவுக்கு வரும், விண்வெளி தொடங்கும் என்கிற கேள்வி சர்வதேச அரசியல் கேள்வியாக மாறியது.