மண்டல பூஜையையொட்டி டிச.25, 26-ம் தேதிகளில் நெரிசலை தவிர்க்க சபரிமலையில் புதிய கட்டுப்பாடு

தேனி: சபரிமலையில் ஐயப்பனுக்கு தங்க அங்கி அணிவித்து வரும் 26-ம் தேதி மண்டல பூஜை நடைபெற உள்ளது. இதையொட்டி, நெரிசலைத் தவிர்க்கும் வகையில் வரும் 25, 26-ம் தேதிகளில் ஆன்லைன் மற்றும் ஸ்பாட் புக்கிங் எண்ணிக்கை குறைக்கப்பட உள்ளதாக தேவசம் போர்டு தெரிவித்துள்ளது.

சபரிமலை ஐயப்பன் கோயிலில் கடந்த நவ. 16-ம் தேதி முதல் மண்டல கால வழிபாடுகள் நடைபெற்று வருகின்றன. இதற்காக தினமும் அதிகாலை 3 மணிக்கு நடை திறக்கப்பட்டு, இரவு 11 மணி வரை வழிபாடுகள் நடைபெறுகின்றன. தினமும் சராசரியாக 80 ஆயிரம் பக்தர்களை அனுமதிப்பதற்கான வசதிகள் செய்யப்பட்டுள்ளன. எனினும், பக்தர்களின் எண்ணிக்கை அதிகரித்து வருகிறது. நேற்று முன்தினம் அதிகபட்சமாக 96,853 பேர் சுவாமி தரிசனம் செய்துள்ளனர்.