30 ஐபிஎல் இன்னிங்ஸில் அதிக ரன்கள்: கெயில், வில்லியம்சனை முந்திய சாய் சுதர்சன்!

அகமதாபாத்: நடப்பு ஐபிஎல் சீசனில் ராஜஸ்தான் ராயல்ஸ் அணிக்கு எதிராக 53 பந்துகளில் 82 ரன்கள் எடுத்தார் குஜராத் டைட்டன்ஸ் வீரர் சாய் சுதர்சன். இதன் மூலம் 30 ஐபிஎல் இன்னிங்ஸ் ஆடி, அதிகம் ரன்கள் எடுத்த வீரர்களின் பட்டியலில் இரண்டாவது இடத்தை பிடித்துள்ளார். இந்தப் பட்டியலில் கிறிஸ் கெயில், கேன் வில்லியம்சன் ஆகியோரை அவர் பின்னுக்கு தள்ளியுள்ளார்.

23 வயதான சாய் சுதர்சன், கடந்த 2022-ம் ஆண்டு ஐபிஎல் சீசன் முதல் குஜராத் அணிக்காக விளையாடி வருகிறார். இதுவரை 30 இன்னிங்ஸ் ஆடியுள்ள அவர், 1307 ரன்களை எடுத்துள்ளார். 9 அரை சதம் மற்றும் 1 சதம் பதிவு செய்துள்ளார். ஸ்ட்ரைக் ரேட் 141.60.