ஹாலிவுட்டில் இருந்து பாலிவுட் வழியாக வந்த ‘அடுத்தவாரிசு’!

ஹாலிவுட்டில், இங்ரிட் பெர்க்மேன், யூல் பிரைன்னர், ஹெலன் ஹையஸ் நடித்து 1956-ல் வெளியான படம், ‘அனஸ்டேசியா’. இந்தப் படத்தின் தாக்கத்தில் இந்தியில், தர்மேந்திரா, ஹேமமாலினி நடிப்பில் ‘ராஜா ஜானி’ என்ற படத்தை உருவாக்கினார்கள். மோகன் சேஹல் இயக்கத்தில் 1972-ம் ஆண்டு வெளியாகி வெற்றி பெற்ற இந்தப் படத்தின், தமிழ் ரீமேக்தான், ‘அடுத்த வாரிசு’!. ஹாலிவுட்டில் இருந்து பாலிவுட் வழியாக தமிழுக்கு வந்த படம்.

சோமநாதபுரம் ஜமீனையும் அவருடைய மனைவியையும் ஒரு கும்பல் கொன்று விடுகிறது. அவர்களின் 6 வயது மகள் ராதா, ஆற்றோடு அடித்துச் செல்லப்படுகிறாள். ராதாவின் பாட்டியான ஜமீனின் ராணி ராஜலட்சுமி, தனது பேத்தி எங்கோ உயிரோடு இருப்பதாக நம்புகிறார். அதற்கு, ஆற்றோடு அடித்துச் செல்லப்பட்ட பேத்தி, அவருடைய 18 வயதில் திரும்புவாள் என்று ஜோதிடர் சொன்னது காரணமாக இருக்கிறது.