யுஎஸ் ஓபன் இன்று தொடக்கம்: ரூ.747 கோடி பரிசுத் தொகை

நியூயார்க்: ஆண்டின் கடைசி கிராண்ட்ஸ்லாம் டென்னிஸ் தொடரான யுஎஸ் ஓபன் அமெரிக்காவின் நியூயார்க் நகரில் இன்று (24-ம் தேதி) தொடங்குகிறது. யுஎஸ் ஓபன் வரலாற்றில் ஓபன் ஏராவில் ஞாயிற்றுக்கிழமை போட்டி தொடங்குவது இதுவே முதன்முறையாகும். மேலும் இம்முறை போட்டிகள் மொத்தம் 15 நாட்கள் நடைபெறுகின்றன. வழக்கமாக இந்த தொடர் 14 நாட்களில் நடத்தி முடிக்கப்படும்.

நடப்பு சாம்பியனும், முதல் நிலை வீரருமான இத்தாலியின் ஜன்னிக் சின்னர், 2-ம் நிலை வீரரான ஸ்பெயினின் கார்லோஸ் அல்கராஸ், 24 கிராண்ட்ஸ்லாம் பட்டங்களை வென்று குவித்துள்ள செர்பியாவின் நோவக் ஜோகோவிச், முன்னாள் சாம்பியனான ரஷ்யாவின் டேனியல் மேத்வதேவ், அமெரிக்காவின் முன்னணி வீரர்களான பென் ஷெல்டன், டெய்லர் ஃபிரிட்ஸ், பிரான்சஸ் தியாஃபோ உள்ளிட்ட நட்சத்திரங்கள் பலர் பட்டம் வெல்ல மோதுகின்றனர்.