சவரன் ரூ.60,000-ஐ தாண்டியது: தங்கம் விலை மென்மேலும் உயருமா?

சென்னை: சென்னையில் ஆபரணத் தங்கத்தின் விலை ரூ.60 ஆயிரத்தை தாண்டி, தங்கம் விலை வரலாற்றில் புதிய உச்சத்தை பதிவு செய்தது. ஆபரணத் தங்கம் பவுனுக்கு ரூ.600 உயர்ந்து, ரூ.60,200-க்கு விற்பனை செய்யப்பட்டது.

சர்வதேச பொருளாதார சூழல், அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில் தங்கம் விலை நிர்ணயிக்கப்படுகிறது. டிச.8-ம் தேதிக்கு பிறகு, தங்கம் விலை உயர்ந்து வந்தது. ஜன.3-ம் தேதி ரூ.58,080 ஆகவும், ஜன.16-ம் தேதி ரூ.59,120 ஆகவும் இருந்தது. விரைவில் பவுன் தங்கம் ரூ.60 ஆயிரத்தை தொடும் என்று சந்தை நிபுணர்கள், தங்க நகை வியாபாரிகள் கணித்திருந்தனர். இந்நிலையில், சென்னையில் ஆபரணத்தங்கத்தின் விலை ரூ.60 ஆயிரத்தை தாண்டி, புதிய விலை உச்சத்தை தொட்டது.